Obama Trampın hakimiyyətə qayıtmasından narahatdır

ABŞ-nin keçmiş prezidenti demokrat Barak Obama keçmiş Respublikaçı prezident Donald Trampın Ağ Evə qayıtması ehtimalından narahat olduğu üçün hazırkı ABŞ lideri Co Bayden və onun tərəfdarlarını seçki kampaniyasını aktivləşdirməyə çağırır.

Bu barədə ABŞ-nin “The Washington Post” qəzeti mənbələrə istinadən məlumat yayıb.

Məlumata görə, Obama Bayden və onun köməkçiləri ilə kampaniyanın yenidən qurulması və Baydenin kampaniyasına Ağ Evlə məsləhətləşmədən qərar qəbul etmək səlahiyyətinin verilməsi zərurəti barədə danışıb.

Mənbələr bildiriblər ki, Obama son aylarda Ağ Evdə özəl şam yeməyi zamanı Baydenlə bu mövzuda şəxsən danışıb və bu barədə ictimaiyyətə məlumat verilməyib. Keçmiş prezident Trampın rəqib ola biləcəyi respublikaçıların sərt rəqabəti qarşısında kampaniyanı daha aqressiv etməyi tövsiyə edib. Obama həmçinin Baydenə 2012-ci ildə uğurlu təkrar seçki kampaniyası keçirən seçkiqabağı ştabının keçmiş üzvlərindən məsləhət almağı tövsiyə edib.

Qeyd edək ki, keçən il aprelin 25-də Demokratlar Partiyasını təmsil edən ABŞ lideri Co Bayden ən yüksək hökumət postuna yenidən seçilmək üçün əlindən gələni edəcəyini açıqlamışdı. Tramp isə 2022-ci ilin noyabrında seçki yarışına qatılacağını elan edib. O, Respublikaçılar Partiyasının daha çox ehtimal olunan namizədidir.