"Rusiya ehtiyat edir ki, Ermənistanın dərinləşən avrointeqrasiyası onun hava məkanının Avropa İttifaqının əvvəllər etdiyi kimi, Rusiya təyyarələri üçün bağlanmasına səbəb ola bilər".
Oxu.Az-ın TASS-a istinadən verdiyi xəbərə görə, bu sözləri Rusiya Baş nazirinin müavini Aleksey Overçuk Sankt-Peterburq Beynəlxalq İqtisadi Forumunun sessiyasındakı çıxışı zamanı deyib.
"Baxın, hazırda bizim Avropa İttifaqı ilə heç bir hava əlaqəmiz yoxdur. Avropa İttifaqı səmasını Rusiya təyyarələrinin üzünə bağlayıb. Ermənistan da səmasını bağlayacaq? Əgər siz Avropa İttifaqına daxil olarsınızsa, o zaman bəli, çünki Brüssel sizə səmanı bağlamağınızı deyəcək və siz də səmanı bağlayacaqsınız, başqa seçiminiz olmayacaq. Bəs sonra?", - deyə o soruşub.
Baş nazirin müavini mümkün məhdudiyyətin əhəmiyyətli sayda uçuşlara təsir edəcəyinə, həmçinin yükdaşıma sisteminin də pozula biləcəyinə diqqət çəkib.
"Bir həftədə yüzlərlə uçuş necə olacaq? Yaxşı, Tbilisi üzərindən keçəcəklər, aydındır. Eyni şey sərhəddəki daşınmalara da aiddir - siz bunu bilirsiniz, çünki erməni yük maşını Yuxarı Larsa çatacaq, sonra yük Belarus və ya Rusiya yük maşınına köçürüləcək, o da yükü Rusiyaya çatdıracaq, erməni sürücü isə Ermənistana qayıdacaq. Bax, bu həqiqətən də ola bilər", - deyə o qeyd edib.
"Buna məhəl qoymamaq və bu məsələlər haqqında düşünməmək mümkün deyil. Biz bu barədə düşünürük, qiymətləndiririk", - deyə Overçuk vurğulayıb.
