Pakistanın Bəlucistan əyalətində - Ziarat bölgəsində yerləşən polis məntəqəsinə silahlı basqın edilib. Basqın nəticəsində ikisi zabit olmaqla 9 polis əməkdaşı həlak olub.
Oxu.Az xəbər verir ki, bu barədə yerli hakimiyyət orqanlarına istinadən Pakistan mediası məlumat yayıb.
Ziarat bölgəsinin komissar müavini Əbdül Qüdus Açakzay baş vermiş hadisəni terror hücumu kimi qiymətləndirərək, beş polis işçisinin itkin düşdüyünü vurğulayıb. Təhlükəsizliyi təmin etmək məqsədilə hadisə yerinə əlavə qüvvələr göndərilib.
Pakistan Münaqişə və Təhlükəsizlik Tədqiqatları İnstitutu bildirir ki, iyun ayında sözügedən əyalətdə terror hadisələrinin səviyyəsində nəzərəçarpacaq dərəcədə azalma qeydə alınıb. Belə ki, may ayında 71 hücum baş verdiyi halda, iyunda bu göstərici 49-a düşüb ki, bu da terror aktivliyinin 31% azalması deməkdir.
