Pavel Durov 12 cinayətdə ittiham olunub

"Telegram"ın yaradıcısı Pavel Durov 12 cinayətdə ittiham olunub.

Oxu.Az xəbər verir ki, bu barədə prokurorluğun saytında dərc olunmuş press-relizdə bildirilir.

Paris prokurorluğunun məlumatına görə, ona qarşı iş iyulun 8-də Fransada açılıb və həbs müddəti avqustun 28-də başa çatır.

Pavel Durovun ittiham edildiyi cinayətlərin bəziləri aşağıdakılardır:

- mütəşəkkil qrupların qanunsuz əməliyyatlarının aparılması üçün onlayn platformanın idarə edilməsində iştirak;

- hüquq-mühafizə orqanlarının tələbi ilə ibtidai araşdırmanın aparılması və istifadəsi üçün zəruri olan məlumatları və ya sənədləri verməkdən imtina;

- yetkinlik yaşına çatmayanlarla pornoqrafik məzmunun saxlanmasında iştirak;

- narkotiklərin yayılmasında iştirak;

- kibercinayətlərdə iştirak;

- mütəşəkkil cinayətkar qrupların tərkibində dələduzluqda iştirak.