Təxminən 12 min nəfər, həmçinin təqribən 300 insanabənzər robot Pekin beynəlxalq yarımmarafonunda iştirak edib.
Oxu.Az TASS-a istinadən xəbər verir ki, ağıllı robotlar arasında finişə birinci "Tsityan Daşen" ("Ulduz partlayışı") kollektivinin "Şanydyan" ("İldırım") robotu çatıb.
O, keçənilki rekorddan üç dəfədən çox yaxşı nəticə göstərib və 21 km məsafəni 50 dəqiqə 26 saniyəyə qət edib.
Təşkilatçıların sözlərinə görə, bu nəticə yarımmarafonda insanlar arasında qeydə alınmış dünya rekordunu (56 dəqiqə 42 saniyə) üstələyir. İnsanlar arasında qalibiyyəti Çin idmançıları qazanıblar: kişilər arasında Çjao Haytsze (1 saat 7 dəqiqə 47 saniyə) və qadınlar arasında Van Çyaosya (1 saat 18 dəqiqə 6 saniyə). Ümumilikdə iştirak üçün 18 yaşdan yuxarı 32 mindən çox şəxs müraciət edib.
Yarımmarafonda humanoid robotları 100-dən çox komanda təqdim edib. Onlardan beşi xarici klubdur. Yarışda komandaların təxminən 40%-i avtonom, 60%-i isə uzaqdan idarəetmə ilə robotlardan istifadə edib. Robotlar məsafəni insanlarla birlikdə, lakin ayrılmış cığırla qət ediblər.
