Rusiya prezidentinin mətbuat katibi Dmitri Peskov arzuolunan xarici dilin öyrənilməsi üzrə kifayət qədər bal toplamadığına görə cəza olaraq türk dilini öyrənib.
Oxu.Az-ın "Birinci kanal"a istinadən xəbərinə görə, bu barədə Kremlin nümayəndəsi özü jurnalistlərlə söhbətində danışıb.
"Dili özüm seçmək hüququnu əldə etmək üçün hətta ikinci dəfə də tələb olunan balları toplaya bilmədim. Əslində, ərəb dilini öyrənmək istəyirdim. Aşağı nəticə göstərdiyimə görə məni türk dilini öyrənməyə məcbur etdilər", - deyə Peskov bildirib.
Onun qeyd etdiyinə görə, türk dilinin öyrənilməsi üzrə bir neçə il davam edən əziyyətli işdən və türkologiya sahəsində biliklərin dərinləşdirilməsindən sonra bu qənaətə gəlib ki, əldə edilən təcrübə son dərəcə dəyərli olub.
Qeyd edək ki, Peskov Moskva Dövlət Universitetinin Asiya və Afrika Ölkələri İnstitutunun məzunudur.
