İspaniya milli komandasının futbolçuları Serxio Ramos və Jerar Pike siyasi zəmində dava ediblər.
Oxu.Az "AS" nəşrinə istinadən xəbər verir ki, münaqişəyə Kataloniyanın İspaniyadan ayrılaraq, müstəqilliyini elan etməsi ilə bağlı referendum səbəb olub.
Məlumata əsasən, “Real Madrid”in kapitanı Ramos “Barselona”nın müdafiəçisi Pikeni yığmanın düşərgəsində əhval-ruhiyyəni pozmaqda ittiham edib. Bu isə DÇ-2018 seçmə kampaniyalarının Albaniya (6 oktyabr) və İsraillə (9 oktyabr) matçlarına hazırlaşan komandanın oyununa təsir göstərə bilər.
Xatırladaq ki, Kataloniyanın müstəqilliyinə səs verən Pike milli komandadan getməyə hazır olduğunu deyib.
N.O.
