Hərbi aviasiyanın hərəkətə gətirilməsi ilə əlaqədar olaraq Polşada yerləşən Lyublin və Jeşuv hava limanları öz fəaliyyətini müvəqqəti dayandırıb.
Oxu.Az xəbər verir ki, bu barədə Polşanın Hava Hərəkəti Agentliyi (PANSA) "X" sosial şəbəkəsindəki hesabında bəyanat yayıb.
Məlumata əsasən, sentyabrın 16-da Polşa hərbçiləri Rusiyanın Ukraynaya endirdiyi iddia edilən raket zərbələri fonunda qabaqlayıcı tədbirlər həyata keçirdiklərini bildiriblər.
Bir müddət əvvəl Polşanın milli müdafiə naziri Vladislav Kosinyak-Kamış qeyd edib ki, rəsmi Varşava infrastrukturun möhkəmləndirilməsi məqsədilə Ukrayna ilə sərhədə ordu mühəndis bölmələri cəlb edib.
Nazir daha əvvəlki çıxışında Polşanın Ukrayna sərhədindəki buraxılış məntəqələrində təhlükəsizlik tədbirlərini artırdığını, o cümlədən müşahidə və mühafizə postları inşa etdiyini vurğulamışdı. O, bu addımların atılmasına səbəb kimi Rusiya tərəfindən gələn təhlükəni göstərib.
Polşa Silahlı Qüvvələrinin Baş Komandanlığından verilən məlumata görə, hərbçilər "Şərq qalxanı" proqramı çərçivəsində fəaliyyət göstərirlər. Bu prosesə xüsusi "Hesco bastions" hərbi maneələrindən istifadə etməklə istehkamların qurulması da daxildir.
