Ukraynanın keçmiş prezidenti və Avropa Həmrəylik Partiyasının lideri Pyotr Poroşenkonun həyat yoldaşı Marinanın əmlak bölgüsü ilə bağlı iddiası üzrə məhkəmə işi bağlanıb.
Oxu.Az xəbər verir ki, bu barədə "Obşestvennoye" nəşri məlumat verib.
"Məhkəmə qərar verdi: mübahisənin predmeti olmadığına görə iş üzrə icraata xitam verilsin. Eyni tərəflər arasında eyni mövzuda və eyni əsaslarla mübahisə ilə bağlı məhkəməyə təkrar müraciətlərə yol verilmir", - deyə nəşr məhkəmə sənədindən sitat gətirib.
Daha sonra Pyotr Poroşenkonun vəkili bildirib ki, bu qərardan 15 gün ərzində apellyasiya şikayəti verilə bilər.
Xatırladaq ki, Poroşenkonun həyat yoldaşı onların birgə əmlakının bölünməsi üçün martın 27-də məhkəməyə müraciət edib. Avropa Həmrəyliyi Partiyası faktiki olaraq etiraf edib ki, bu hərəkətlər Poroşenkonun aktivlərini Kiyev hakimiyyətinin tətbiq etdiyi məhdudiyyətlər altından çıxarmaq üçün çıxış yoludur.
Bu ilin fevralında Vladimir Zelenski Poroşenkoya qarşı müddətsiz sanksiyalar tətbiq edib. Burada aktivlərin bloklanması, ticarət əməliyyatlarının qadağan edilməsi, iqtisadi və maliyyə öhdəliklərinin dayandırılması, kapitalın ölkədən çıxarılmasının qarşısının alınması və ayrı-ayrı şəxslərin dövlət mükafatlarından məhrum edilməsi nəzərdə tutulur. Poroşenkoya qarşı bir neçə cinayət işi açılıb.
