Mayın 5-də Portuqaliyanın paytaxtı Lissabonda işgəncə vermək və vəzifə səlahiyyətlərini aşmaqda təqsirləndirilən 15 polis əməkdaşı saxlanılıb.
Oxu.Az xəbər verir ki, bu barədə "The Resident" portalı məlumat yayıb. İstintaq çərçivəsində həmçinin bir mülki şəxsin də həbs edildiyi bildirilir.
Bu hadisələr Portuqaliyada hələ yanvar ayında başlayan böyük qalmaqalın davamıdır. Həmin vaxt İctimai Təhlükəsizlik Polisinin (PSP) bir neçə bölməsində hüquq-mühafizəçilərin saxlanılan evsizlərə, qanunsuz miqrantlara və qeyri-qanuni maddələrin satışında şübhəli bilinən şəxslərə müntəzəm olaraq işgəncə verdiyi, onları döydüyü məlum olmuşdu. İş üzrə əvvəlcə iki, daha sonra isə yeddi polis həbs edilmişdi. Son tədbirlər də nəzərə alınmaqla, həbs olunanların ümumi sayı 25 nəfərə çatıb.
Yerli mətbuat bu qalmaqalı artıq "şokedici" adlandırıb. Sözügedən işgəncə məsələsi parlamentin müzakirəsinə belə çıxarılıb.
