Sankt-Peterburq şəhərindəki Konstantinov sarayında Prezident Vladimir Putinlə Rusiyaya səfər edən ABŞ prezidentinin xüsusi elçisi Stiv Uitkoff arasında görüş keçirilir.
Oxu.Az-ın TASS-a istinadən verdiyi məlumata görə, Putin Uitkoffdan Ukrayna ilə bağlı səylərinə görə təkcə Donald Trampa deyil, həmçinin onun həyat yoldaşı Melaniyaya da səmimi təşəkkürünü çatdırmağı xahiş edib.
"Tramp söhbətlərində, eləcə də son telefon danışığında hər iki tərəfin canlı qüvvə itkilərini nəzərə alaraq, bu münaqişənin dayandırılmasının zəruriliyini xüsusi vurğulayıb. Böhranın həllində göstərdiyiniz diqqətə görə sizə və Prezident Trampa minnətdarlığımı bildirmək istəyirəm. Bilirəm ki, Prezident Tramp bu məsələyə ilk növbədə humanitar baxımdan xüsusi önəm verir", - deyə Rusiya dövlət başçısı bildirib.
Rusiya lideri əlavə edib ki, Çində Trampla baş tuta biləcək görüşlə bağlı bəzi mülahizələri Uitkoffla müzakirə etmək niyyətindədir.
Tərəflər həmçinin İran ətrafındakı vəziyyəti və bu ölkənin nüvə proqramını diqqət mərkəzində saxlayıblar.
"Əgər mümkün hesab etsəniz, Yaxın Şərqdə və İran ətrafında baş verən proseslərlə bağlı sizin qiymətləndirmələrinizi öyrənmək mənim üçün çox maraqlı olardı. Bu böhranın nizamlanması üçün əlimizdən gələn nəsə varsa, məmnuniyyətlə edərik.
Bilirsiniz ki, bizim İranla, oradakı tərəfdaşlarımızla xüsusi, etibarlı münasibətlərimiz var, çünki bu əlaqələr onilliklər boyu formalaşıb. Rusiyanın İranın nüvə problemi ilə bağlı təklifləri isə hər kəsə yaxşı məlumdur".
Qeyd edək ki, Rusiya liderinin amerikalı xüsusi elçi ilə görüşündə Rusiya dövlət başçısının köməkçisi Yuri Uşakov və Prezidentin xarici ölkələrlə investisiya-iqtisadi əməkdaşlıq üzrə xüsusi nümayəndəsi Kirill Dmitriyev də iştirak edirlər.
Uşakovun daha əvvəl verdiyi məlumata görə, danışıqların əsas mövzusu Ukrayna münaqişəsidir.
Bildirilir ki, Uitkoff Sankt-Peterburqa Oslodan gəlib. O, orada Ukrayna Prezidenti Volodimir Zelenski ilə danışıqlar aparıb. Həmin görüşdə Avropa dövlətlərinin nümayəndələri də iştirak ediblər. Xəstəliyi səbəbindən Kuşner isə danışıqlara onlayn formatda qatılıb.
Rusiya Federasiyasının Prezidenti Vladimir Putinlə ölkəyə səfər edən ABŞ prezidentinin xüsusi elçisi Stiv Uitkoff arasında görüş başlayıb.
Oxu.Az-ın Rusiya mətbuatına istinadən verdiyi məlumata görə, dövlət başçısı Uitkoffla söhbəti zamanı Ukrayna böhranının həllinə göstərdiyi diqqətə görə ABŞ lideri Donald Trampa təşəkkürünü bildirib.
Rusiya prezidenti vurğulayıb ki, ABŞ rəhbəri onunla son danışığında insan itkilərinin qarşısını almaq üçün münaqişənin dayandırılmasının vacibliyini xüsusi qeyd edib.
Bundan əlavə, Rusiya lideri Moskvanın Vaşinqtonla iqtisadi əlaqələrin və əməkdaşlığın bərpa olunmasında maraqlı olduğunu diqqətə çatdırıb.
Öz növbəsində, Uitkoff Ukrayna münaqişəsinin həlli yollarının əks olunduğu sənədləri özü ilə gətirdiyini bildirib. O, ABŞ vətəndaşı Stiven Habbardın sərbəst buraxılmasına görə Vladimir Putinə təşəkkürünü çatdırıb.
Rusiya prezidenti isə qeyd edib ki, Habbard artıq Pulkovo hava limanındadır.
