Rusiya prezidenti Vladimir Putinin tayqaya buraxdığı “Kuzya” ləqəbli Amur pələngi öz gəzəyən xarakterinə görə Çinə üzüb.
Oxu.Az xəbər verir ki, bu barədə “İnterfaks” Amuroxotupravleniya-nın şöbə rəisi Valeri Poqasiyenkoya istinadən məlumat yayıb.
“Çoxları yazır ki, Kuzya Çinə ac olduğu üçün keçib. Lakin məndə belə versiya şübhə doğurur, çünki onun Amur vilayətində də yem bazası yaxşı olub. Biz onu izləyirdik – yaxşı qidalanırdı. Lakin onun gəzəyən pişik xarakteri var”, - deyə, agentliyin müsahibi bildirib.
Öz növbəsində Çin rəhbərliyi Kuzyanın qayğısına qalacağını söyləyib.
Güman olunur ki, pələng hazırda Lobey dairəsində yerləşən Taypinqou qoruğunun ərazisindədir.
Heyvanı çəkmək üçün qoruq əməkdaşları pələngin güman olunan hərəkət marşrutu istiqamətində 60-dan çox kamera quraşdırıblar. Bundan başqa, onlar brakonyer tələlərinin olub-olmadığını yoxlamaq üçün qorunan ərazini araşdırmağa başlayıblar. Pələngin qida ilə bağlı problemləri yaranarsa, çinlilər əraziyə “bir neçə iribuynuzlu heyvan buraxacaqlarına” söz veriblər.
Pələng Kuzya insanların əlinə il yarım əvvəl düşüb. O zaman Ussuriya tayqasında yerli sakinlər aclıqdan ölən beş pələng balası aşkarlayıblar. Onlardan ikisi dişi, üçü erkək olub. Onları Primoryedəki Pələnglərin reabilitasiyası və teintroduksiyası mərkəzinə göndəriblər. Burada heyvanlara qayğı göstərilib, onlara Borya, Kuzya, Ustin, Svetlaya və İlona adları verilib.
Kuzya ləqəbli pələng tayqaya 22 may 2014-cü ildə, Rusiya prezidenti Vladimir Putinin iştirakı ilə buraxılıb, polit.ru yazır.
