Türkiyə Xarici İşlər Nazirliyi Qara dənizdə vurulan yük gəmisi ilə bağlı açıqlama verib.
Oxu.Az-ın xəbərinə görə, bu barədə nazirlik rəsmi saytında paylaşım edib.
"Ötən gecə (28 may) Ukraynanın Odessa limanından Türkiyəyə quru yük daşıyan Türkiyəyə məxsus, Vanuatu bayrağı altında üzən gəminin PUA hücumuna məruz qaldığı və iki ekipaj üzvünün yüngül yaralandığı məlum olub.
Gəmidə işləyən vətəndaşlarımızın vəziyyəti Odessadakı baş konsulluğumuz tərəfindən yaxından izlənilir.
Son zamanlarda Qara dənizdə müşahidə edilən müharibə ilə əlaqəli eskalasiyanın bölgəmiz üçün yaratdığı risklər və təhdidlərlə bağlı narahatlıqlarımız, ölkəmizə yönəlmiş mümkün mənfi təsirlərlə bağlı xəbərdarlıqlarımız məsələ ilə əlaqəli bütün tərəflərə hər bir səviyyədə ifadə edilib.
Müharibənin nəzarətsiz şəkildə eskalasiyasına səbəb ola biləcək addımlardan çəkinmək istiqamətindəki xəbərdarlıqlarımızı müvafiq tərəflərə yenidən bildiririk.
Qara dənizdə mülki gəmilərin naviqasiya təhlükəsizliyinin təmin edilməsi və müharibəyə danışıqlar yolu ilə son qoyulması yönündə çağırışlarımız qüvvədə qalır.
Eskalasiyanın qarşısını almaq və sülh prosesini sürətləndirmək üçün regional əsaslı və nəticəyə yönəlmiş tədbirlər hazırlamağa hazır olduğumuzu əlaqəli tərəflərə xatırladırıq", - deyə açıqlamada bildirilib.
Qara dənizdə Türkiyə gəmisi vurulub. Mayın 29-na keçən gecə Rusiya Odessa vilayətindəki limanlardan birindən Türkiyəyə gedən gəmiyə PUA (Pilotsuz Uçuş Aparatı - dron) zərbəsi endirib.
Oxu.Az-ın xəbərinə görə, bu barədə Ukrayna Hərbi Dəniz Qüvvələri öz "Telegram" kanalında məlumat verib.
Məlumata görə, zərbə nəticəsində gəminin iki ekipaj üzvü yaralanıb. Onlar Ukrayna Hərbi Dəniz Qüvvələrinin qayıqları ilə təxliyə edilib və tibb müəssisəsinə aparılıblar.
Qeyd edilib ki, hücum zamanı Rusiya ordusu Vanuatu bayrağı altında Odessa bölgəsindəki limandan Türkiyəyə yük daşıyan ANT gəmisinə qarşı dronlardan istifadə edib.
Zərbə nəticəsində Türkiyəyə məxsus gəmidə yanğın baş verib.
Ukrayna Dəniz Axtarış-Xilasetmə Xidmətinin və Ukrayna Hərbi Dəniz Qüvvələrinin bölmələri tərəfindən yanğın tez bir zamanda lokallaşdırılaraq söndürülüb.
