Ronaldu Səudiyyə Ərəbistanının futbol infrastrukturunu tərifə tutdu

"Ən-Nəsr" klubunun portuqaliyalı futbolçusu Kriştianu Ronaldu Səudiyyə Ərəbistanının 2034-cü ildə keçiriləcək dünya çempionatına ev sahibliyi etmək iddiasına münasibət bildirib.

Oxu.Az xarici KİV-ə istinadən xəbər verir ki, hücumçu hazırda top qovduğu ölkənin futbol infrastrukturunu o ki var tərifləyib:

"Burada hər şey əladır, infrastruktur, stadionlar, azarkeşlər üçün şərait. Bütün bunları görəndə getdikcə daha çox əmin oluram ki, 2034-cü ildə keçiriləcək dünya çempionatı tarixin ən yaxşısı olacaq".

38 yaşlı ulduz futbolçu əlavə edib ki, Səudiyyə Ərəbistanının futbol çempionatı son illər ərzində çox irəli gedib.

"Hazırda liqada kubok uğrunda yeddi və ya səkkiz böyük komanda mübarizə aparır. Futbolçuların yaxşılaşdığını görürəm. Bu həm komanda yoldaşlarıma, həm də digər oyunçulara aiddir. Bu o deməkdir ki, liqa çox sürətlə inkişaf edib və daha yaxşı oyunçular yetişib".