Rusiyada islah koloniyasında baş verən qiyamla bağlı dindirilmələr başlayıb

Rusiyada müstəntiqlər girov götürüldükdən sonra Volqoqrad vilayətindəki 19 saylı islah koloniyasının (İK) əməkdaşlarını dindirir.

Oxu.Az bu barədə TASS-a istinadən xəbər verir.

Məlumata görə, İK-19-da əməliyyat-istintaq qrupu fəaliyyət göstərir. Koloniya işçilərinin, eləcə də məhkumların dindirilməsi aparılır.

Məhkumların İK ərazisinə mobil telefonlar, qayçı, bıçaq və partlayıcı qurğunun komponentləri ilə necə girdiyi də müəyyən edilir.

Bildirilib ki, hazırda məhkumlarda qadağan olunmuş əşyaların olub-olmamasının müəyyənləşdirilməsi istiqamətində yoxlamalar aparılır.

Qeyd edək ki, avqustun 23-də Volqoqrad vilayətinin Surovikino şəhərində İK-19-un dörd məhbusu səkkiz koloniya əməkdaşını və dörd məhkumu girov götürüb. Federal Penitensiar Xidmətin məlumatına görə, dörd islah zabiti bıçaq xəsarətləri alıb. Bu işçilərin həyatını xilas etmək mümkün olmayıb.

Xüsusi təyinatlılar girovları azad etmək üçün əməliyyat keçiriblər. Hücum zamanı bütün cinayətkarlar məhv edilib. Xüsusi təyinatlılar arasında itki olmayıb.