İyulun 11-nə keçən gecə saat 01:54-də (Bakı vaxtı ilə 00:54 - red.) Rusiyanın Çelyabinsk vilayəti üzərindən meteor uçub. Səma cisminin uçuşu küçə kameraları tərəfindən qeydə alınıb.
Oxu.Az xəbər verir ki, bu barədə "74.ru" portalı məlumat yayıb.
Yerli sakinlərdən biri də həmçinin, işıq topunun görüntülərini paylaşıb. O, videonu Çelyabinskin cənub hissəsində çəkdiyini qeyd edib.
Meteorun uçuşu Kurqan, Maqnitoqorsk və 700 km radiusda olan digər şəhərlərdə görünüb.
Rusiyanın Ural Federal Universitetinin alimi Viktor Qroxovski TASS-a şərhində qeyd edib ki, cisim insanlar üçün təhlükə yaratmır. Üstəlik, onun sözlərinə görə, hələlik meteorun hara düşdüyü barədə məlumat yoxdur. Onun yerinin dəqiq müəyyən edilməsi bir neçə gün çəkəcək.
