Rusiyanın Stavropol şəhər administrasiyası rəhbərinin birinci müavini Zaur Qurtsiyev ötən gecə baş verən partlayış nəticəsində həlak olub.
Oxu.Az-ın xəbərinə görə, bu barədə Stavropol diyarının qubernatoru Vladimir Vladimirov öz "Telegram" kanalında məlumat verib.
Vladimirov bildirib ki, hüquq-mühafizə orqanları hadisə yerində işləri davam etdirir. Terror aktı da daxil olmaqla, bütün mümkün versiyalar nəzərdən keçirilir.
Rusiya və Ukrayna KİV-lərinin xəbərinə görə, mayor rütbəsinə sahib olan Zaur Qurtsiyev müharibə veteranı olub, Mariupolda döyüşlərin hava istiqamətinə rəhbərlik edib.
Qeyd edildiyinə görə, partlayış Stavropolda çoxmərtəbəli yaşayış binasının yaxınlığında baş verib. Naməlum şəxs qumbaranı partladıb. Nəticədə iki kişi həyatını itirib ki, onlardan biri də Qurtsiyev olub.
Stavropol administrasiyasının məlumatına görə, Zaur Qurtsiyev "Qəhrəmanların vaxtı" prezident proqramının iştirakçısı olub və 2024-cü ilin sentyabrında vəzifəsinin icrasına başlayıb. O, Rusiya Müdafiə Nazirliyinin ixtisaslı zabiti olub, Aviasiyaya Döyüş Nəzarəti Mərkəzinə rəhbərlik edib. 2007-ci ildən Rusiya Silahlı Qüvvələrində xidmət edib.
Qeyd edilir ki, Stavropolda partlayışı törədən şəxs yaxınlığında hadisənin baş verdiyi eyni binada yaşayıb.
Həmçinin məlumata görə, 29 yaşlı Nikita Penkov hadisənin baş verdiyi Çexov küçəsindəki evdə kirayədə qalıb. O, Krasnodar diyarında anadan olub və rəsmi olaraq heç bir yerdə işləməyib.
Gecə o, Çexovdakı evin yaxınlığında Qurtsyevə yaxınlaşıb, bundan sonra əldəqayırma partlayıcı qurğunu işə salıb. Partlayış nəticəsində Stavropol rəhbərinin müavini ölüb. Faktla bağlı cinayət işi açılıb.
