Rusiya Federasiyası Yaponiyadan orta və yaxınmənzilli zərbələr üçün nəzərdə tutulmuş ABŞ istehsalı olan "Typhon" ("Tifon") yerüstü raket komplekslərinin ölkə ərazisindən dərhal çıxarılmasını tələb edib.
Oxu.Az-ın TASS-a istinadən verdiyi məlumata əsasən, bu barədə Rusiya Xarici İşlər Nazirliyinin rəsmi sözçüsü Mariya Zaxarova bəyanat yayıb.
Rusiya XİN təmsilçisi bildirib ki, sentyabrın 3-də ABŞ-nin "Tifon" raket sistemlərinin Kyusyu adasında yerləşdirilməsi ilə əlaqədar Yaponiya tərəfinə həm Tokioda, həm də Moskvada etiraz notası verilib. Təqdim olunmuş sənəddə xüsusi olaraq qeyd olunur ki, Yaponiya hökuməti Rusiyanın milli təhlükəsizliyinə, o cümlədən regiondakı sülh və sabitliyə yaranan təhdidlərlə bağlı dəfələrlə edilən xəbərdarlıqları qulaqardına vuraraq eyni addımı təkrarlayıb.
Zaxarova əlavə edib ki, Yaponiyanın bu raket sistemlərini hər hansı səbəblə, yerləşdirmə müddəti və metodundan asılı olmayaraq öz ərazisində saxlaması qəbuledilməzdir. Yaponiya tərəfindən bu siyasətə son qoyulması və həmin komplekslərin ölkədən dərhal çıxarılması tələb olunub.
Bununla yanaşı, rəsmi Tokionun İkinci Dünya müharibəsinin yekunlarını, xüsusən də Cənubi Kuril adalarına aid ərazi məsələlərini tam şəkildə qəbul etməsinin və yenidən silahlanma (remilitarizasiya) siyasətindən imtina etməsinin vacibliyi də xüsusi vurğulanıb.
Şərhdə həmçinin bildirilir ki, sentyabrın 16-da Rusiya xarici işlər nazirinin müavini Andrey Rudenko Yaponiyanın Moskvadakı səfiri Akira Muto ilə görüşərək, göndərilmiş etiraz notasının məzmununa ciddi yanaşmağı tələb edib.
Rusiya XİN təmsilçisi əlavə edib ki, oxşar etiraz notası yaxın günlərdə Çin hökuməti tərəfindən də Yaponiya XİN-ə ünvanlanıb. Çin tərəfi də adalarda "Tifon" sistemlərinin yerləşdirilməsi və Tokionun hərbiləşdirmə meylləri fonunda dərin narahatlığını ifadə edib.
