Balidə yerləşən hoteldə Rusiya vətəndaşı, 28 yaşlı biznes-təlimçi Artyom A.-nın meyiti aşkar edilib.
Oxu.Az-ın verdiyi məlumata görə, bu barədə "Shot" "Telegram" kanalı xəbər verib.
Məlumata görə, Şimali Kuta bölgəsindəki hotelin işçiləri turistin uzun müddət otaqdan çıxmamasından narahat olublar. Personal otağın qapısını döysə də, cavab verən olmayıb. Daha sonra hotel əməkdaşlarından biri birinci mərtəbədə yerləşən otağın pəncərəsindən içəri baxaraq fotolar çəkib və Artyom A.-nın hərəkətsiz vəziyyətdə yerdə uzandığını görüb.
Hadisə yerinə gələn polis qapını sındıraraq içəri daxil olub. Artyom A.-nın cansız bədəni otağın döşəməsində aşkarlanıb - onun başı sellofan torbaya bükülüb, boynunda isə kəmər olub. Əlləri, ayaqları və üzündə cızıqlar, burnu və ağzından isə qan görünüb.
Tibbi ekspertlərə görə, ölüm hadisəsi təxminən 12 saat əvvəl baş verib. Hazırda yerli hüquq-mühafizə orqanları hadisənin başvermə şəraitini araşdırır. Meyit ekspertizaya göndərilib.
Qeyd edək ki, Artyom sosial şəbəkələrdə özünü biznes-psixoloq, təlimçi və sahibkar kimi təqdim edirdi. Onun istifadə etdiyi şüar isə belə olub: "Həyatının hər gününü zövqlə yaşa".
