Meksikada son illərin ən cəsarətli soyğunlarından biri baş verib - silahlı cinayətkarlar "Grupo Minero Bacis" şirkətinə məxsus 33 ton qızıl və gümüş konsentratı daşıyan yük maşınına qarşı diqqətlə planlaşdırılmış hücum həyata keçiriblər. Ekspertlərin qiymətləndirməsinə görə, oğurlanmış yükün dəyəri milyonlarla dollar təşkil edir.
Oxu.Az xəbər verir ki, bu barədə "Bloomberg" məlumat yayıb.
Qeyd olunub ki, hücum təxminən 1.5 saat davam edib.
Məlumata görə, cinayətkarlar iki avtomobilin köməyi ilə yük maşınının yolunu kəsiblər, sürücünü və mühafizəçiləri girov götürüblər. Daha sonra qiymətli yüklə dolu qoşqunu oğurlayıblar. Bu yük Manzanilyo portuna çatdırılmalı imiş. Bir müddət sonra yük maşını tapılıb, lakin qiymətli metal daşıyan qoşqudan heç bir iz qalmayıb.
Hazırda şirkət dəymiş ziyanın dəqiq məbləğini hesablamağa davam edir, lakin artıq aydındır ki, itkilər milyonlarla dollardır.
Hadisə Meksika yollarında cinayət səviyyəsinin kəskin artdığı bir vaxtda baş verib. Rəsmi statistikaya əsasən, təkcə 2025-ci ilin ilk iki ayında qarətlərin sayı üçdəbirdən çox artaraq 24 min hadisəni keçib.
Qeyd edək ki, qızıl və gümüş konsentratları - tərkibində yüksək miqdarda qiymətli metal olan yarımemal xammaldır və bu da onları cinayətkarlar üçün xüsusilə cəlbedici edir.
