Rusiyanın Leninqrad vilayətinin Vsevolojsk rayonunun Novosaratovka kəndində "Wildberries" şirkətinin anbarına PUA hücumu nəticəsində üç nəfər xəsarət alıb.
Oxu.Az xəbər verir ki, bu barədə qubernator Aleksandr Drozdenko sosial media hesabında bildirib.
"PUA-nın düşməsi nəticəsində "Wildberries"in anbarlarında yanğın baş verib. Üç nəfər xəsarət alıb, vəziyyətləri orta ağırdır, hazırda xəstəxanada onlara tibbi yardım göstərilir", - deyə qubernator açıqlayıb.
O, həmçinin bildirib ki, daha bir PUA Kirovsk rayonunun Sinyavino qəsəbəsindəki "Severnaya" quşçuluq fabrikinin anbarlarından birinə düşüb və orada konstruksiyalar uçub. Onun sözlərinə görə, bu obyektdə xəsarət alan yoxdur.
Bundan əvvəl, iyulun 24-nə keçən gecə Sankt-Peterburq qubernatoru Aleksandr Beqlov şəhərin mülki infrastrukturuna dron hücumu barədə məlumat vermişdi. Onun sözlərinə görə, zərbə Moskva şosesindəki obyektlərə dəyib.
Drozdenko isə daha əvvəl də bildirmişdi ki, Leninqrad vilayəti səmasında gecə ərzində 59 PUA məhv edilib.
Leninqrad vilayətində PUA təhlükəsi Moskva vaxtı ilə saat 01:40 radələrində (Bakı vaxtı ilə 02:40-da) elan edilib. Daha sonra Sankt-Peterburq sakinləri PUA təhlükəsi barədə xəbərdar ediliblər. Pulkovo hava limanında reyslərin qəbulu və buraxılışına məhdudiyyətlər tətbiq edilib.
