Çinin Henan əyalətinin Sinsyan şəhərinin məhkəməsi Şaolin monastırının keçmiş başçısı Şi Yunsini 24 il müddətinə azadlıqdan məhrum edib.
Oxu.Az "Reuters" agentliyinə istinadən xəbər verir ki, o, əmlakı mənimsəmə, vəsaitlərin qanunsuz mənimsənilməsi, habelə rüşvət maddələri ilə təqsirli bilinib.
Yunsin 1999-cu ildə Şaolin monastırının rəhbəri təyin olunmuşdu. İstintaqın məlumatına görə, o, cinayət yolu ilə 300 milyon yuandan (təxminən 44 milyon dollar) çox vəsait əldə edib. Azadlıqdan məhrumetmə cəzası ilə yanaşı, rahib 3.5 milyon yuan (517 min dollar) məbləğində cərimə də edilib.
Yunsin təqsirini boynuna alıb və məhkəmənin qərarından apellyasiya şikayəti vermək niyyətində olmadığını bildirib. Çin Buddist Assosiasiyası Yunsini dini rütbəsindən məhrum edib, monastırın yeni başçısı isə Şi İnle olub.
