Sərnişin təyyarələri "Starship"in dağıntıları səbəbindən marşrutu dəyişmək məcburiyyətində qalıb

Atlantik okeanın üzərindən uçan bir neçə təyyarə "Starship" kosmik gəmisinin dağıntılarının düşməsindən sonra istiqaməti dəyişmək və ya uçuşu dayandırmaq məcburiyyətində qalıb.

Oxu.Az xəbər verir ki, bu barədə "Airlive" nəşri məlumat yayıb.

Belə ki, "Starship" kosmik gəmisinin prototipinin yeddinci sınaq uçuşu uğursuz alınıb. Uçuşdan təxminən səkkiz dəqiqə sonra "Starship"lə əlaqə kəsilib. Məlumatlara görə, qəzaya və konstruksiyaların dağılmasına səbəb maye oksigenin sızması olub.

Məlumat üçün əlavə edək ki, "SpaceX" hazırda insanları Mars planetinə apara biləcək "Starship"in prototipini hazırlayır. Şirkətin qurucusu İlon Maskın sözlərinə görə, "Starship" bir neçə ildən sonra pilotsuz rejimdə Marsa səyahət edə biləcək.