Böyük Britaniyanın ikinci ən böyük şəhərinin sakinləri özlərini görünməmiş ekoloji fəlakətin girovuna çeviriblər. Ev pişikləri boyda siçovullar uzun sürən kommunal tətil səbəbindən yığılıb qalmış üfunət qoxuyan zibil tayaları Birmingem sakinlərinin kədərli gündəlik reallığına çevrilib.
Oxu.Az xəbər verir ki, bu barədə "Independent" məlumat verib.
Qeyd olunub ki, vəziyyət kritik həddə çatıb. Sakinlər evlərinin yaxınlığında yığılan zibilləri çıxarmaq üçün özəl şirkətlərə müraciət etmək üçün öz ciblərindən xeyli pul xərcləməyə məcbur olurlar.
"Sakinlər indi evdən çıxarkən qarşılarında bəzən hündürlüyü 5 futdan (1.5 metr) hündür olan üfunətli zibil tayalarını görməyə vərdiş ediblər", - deyə məqalədə bildirilib.
Problemin miqyasını təsəvvür etmək belə çətindir: Birmingemdə təxminən 17 min ton məişət tullantıları yığılıb. Kommunal şirkətlərin əməkdaşlarının bir neçə həftə davam edən tətili şəhər küçələrini zibilliklərə çevirməklə yanaşı, yerli sakinlərin dediyinə görə, qorxunc ölçüyə çatan gəmiricilərin çoxalması üçün ideal şərait yaradıb.
