"Hərbi xronika"nın budəfəki buraxılışında müasir müharibələrdə döyüş sursatı təminatının həlledici rolu və aparıcı hərbi sənaye ölkələrinin bu sahədə istehsal yarışı təhlil olunub.
Bildirilib ki, Ukrayna müharibəsi texnoloji üstünlüklə yanaşı, cəbhənin artilleriya mərmiləri ilə fasiləsiz təmin edilməsinin vacibliyini də üzə çıxarıb. Estoniya kəşfiyyatının hesabatına görə, müharibə iqtisadiyyatına keçən Rusiya 2025-ci ildə iriçaplı sursat istehsalını 17 dəfədən çox artıraraq 7 milyon ədədə çatdırıb. Buna baxmayaraq, tələbatı ödəmək üçün İran və Şimali Koreyadan da milyonlarla mərmi almalı olub.
Qeyd olunub ki, Qərb ölkələri də ehtiyatlarını bərpa etmək məqsədilə istehsal güclərini genişləndirirlər. NATO-nun Avropa üzvləri 155 millimetrlik mərmi istehsalını 2025-ci ildə 1.6-1.8 milyon ədədə çatdırıblar. 2030-cu ildə isə bu göstəricini 3.5 milyon ədədi keçirmək planlaşdırılır.
ABŞ metal gövdə çatışmazlığı səbəbindən aylıq 100 min mərmi istehsalı hədəfinə çata bilməyib və cəmi 36 min ədəd mərmi istehsal edib. Eyni zamanda, Cənubi Koreya və Hindistan qlobal sursat bazarında mövqelərini gücləndirir, Çin isə geniş sənaye potensialına malik olmasına baxmayaraq, faktiki istehsal göstəricilərini açıqlamır.
Vurğulanıb ki, bu proseslər fonunda Azərbaycan da yerli müdafiə sənayesini inkişaf etdirir. "Azroksan" şirkəti ölkədə "AZ-122", "AZ-230" və "AZG-300" reaktiv raket sursatlarının yığılmasına və istehsalına başlayıb. Türkiyənin "ROKETSAN" şirkəti ilə birgə "TEBER" aviasiya bombaları üçün idarəetmə dəstlərinin yerli istehsalı da gündəmdədir.
