Tədqiqatçılar süni intellektin "Bəşəriyyətin son imtahanı" ("Humanity's Last Exam") testində nəticələrinin əhəmiyyətli dərəcədə artdığını qeydə alıblar.
Oxu.Az bu barədə "ScienceDaily" saytına istinadən xəbər verir.
"Bəşəriyyətin son imtahanı" testi "Scale AI" və "Center for AI Safety" qeyri-kommersiya təşkilatlarının mütəxəssisləri tərəfindən hazırlanıb. Testin əsasında 50 ölkədən alimlərin tərtib etdiyi 70 min sual dayanır. Bu suallar arasından 2 500 tapşırıq seçilib. Hər bir sual doktorantura səviyyəsinə uyğun bilik tələb edir. Format qısa və dəqiq cavabları nəzərdə tutur və bu cavabları açıq mənbələrdən tapmaq çətindir.
2024-cü ildə modellər aşağı nəticələr göstərirdi. "ChatGPT" təxminən 3% nəticə əldə etmişdi, "Gemini" və "Claude" isə bir qədər yüksək göstəricilərə malik idi. Həmin dövrdə test dil modellərinin imkanları ilə elmi mütəxəssislərin səviyyəsi arasında ciddi fərqi ortaya qoymuşdu.
Hazırda vəziyyət dəyişib. Tərtibatçıların məlumatına görə, "Gemini" 45,9%, "Claude" isə 34,2% nəticə göstərib. "Scale AI" nümayəndəsi Kelvin Çjan bildirib ki, modellər yaxın aylarda və ya bir il ərzində 100% nəticəyə çata bilər.
Bununla belə, tərtibatçılar hesab edirlər ki, maksimum nəticə əldə olunsa belə, süni intellekt insanı tam əvəz etməyəcək. Söhbət qeyri-standart yanaşma tələb edən tapşırıqlardan, eləcə də interpretasiya və yaradıcı düşüncənin vacib olduğu dar ixtisaslı elmi sahələrdən gedir.
