Suriyalı alim sabiq prerzident Bəşər Əsəd rejimindən qorumaq üçün 15 il əvvəl gizlətdiyi kitabxanasını üzə çıxarıb.
Oxu.Az xəbər verir ki, bu barədə "TRT Haber" məlumat yayıb.
Məlumata görə, Homs şəhərindən olan suriyalı alim 2011-ci ilin oktyabrında Əsəd rejiminin zülmündən qaçaraq Küveytə getməzdən əvvəl böyük zəhmətlə yaratdığı kitabxanasını qorumaq üçün qeyri-adi addım atıb.
Kitablarını özü ilə aparmağa imkanı olmayan alim əsərlərinin talan edilməsinin, zədələnməsinin və ya məhv olmasının qarşısını almaq üçün kitabxananın yerləşdiyi otağın girişini divarla bağlayıb.
Təxminən 15 il sonra vətəninə qayıdan alim illər əvvəl öz əlləri ilə gizlətdiyi kitabxanasının qarşısındakı divarı söküb.
Divarın arxasında dini və elmi əsərlərlə yanaşı, çərçivəyə salınmış Quran səhifələri, şəxsi sənədlər və təsbehlər kimi mənəvi dəyəri yüksək olan əşyalar da aşkarlanıb.
