"Telegram" mesencerinin qısa t.me domeninin bütün brauzerlərdə açılmasında problemlər yaranıb.
Oxu.Az xəbər verir ki, bu barədə "Kod Durova" nəşri məlumat yayıb.
Məlumata görə, .me domen zonasının reyestri t.me domeninin deleqasiyasını dayandırıb. Nəticədə kanallara, paylaşımlara və profillərə aparan keçidlər artıq açılmır və istifadəçiləri tətbiqə yönləndirmir.
Bununla belə, "Telegram" tətbiqinin daxilində bu keçidlər əvvəlki kimi işləyir. Mesencerin daxili brauzeri normal rejimdə fəaliyyətini davam etdirir.
Nasazlığın səbəbi WHOIS məlumatlarında əks olunub. Bildirilir ki, t.me domeni ilə bağlı qeyd 13 iyul 2026-cı ildə yenilənib və ona "serverHold" statusu verilib. Qeyd olunub ki, bu status domen zonasının reyestr operatoru tərəfindən təyin olunur və domenin artıq Domen Adları Sistemi (DNS) çərçivəsində aktiv olmadığını göstərir.
Formal olaraq domen əvvəlki sahibinə məxsus olaraq qalır, lakin IP ünvanına çevrilmədiyi üçün internet üzərindən əlçatmaz olur.
