ABŞ Prezidenti Donald Tramp ona vaxtilə siyasi dəstək verən vəkil Abelardo de la Esprielyanı Kolumbiyada keçirilən prezident seçkisinin birinci turundakı qələbəsi münasibətilə təbrik edib. Ağ Ev rəhbəri seçkinin ikinci turunda da onun namizədliyini dəstəkləyəcəyini bəyan edib.
Oxu.Az-ın məlumatına görə, bu barədə Tramp özünün "Truth Social" sosial şəbəkə hesabında yazıb.
"Kolumbiya prezidentliyinə namizəd, ağıllı, güclü və qətiyyətli lider Abelardo de la Esprielyanı seçkinin birinci turundakı inamlı qələbəsi münasibətilə təbrik edirəm! Onun həyatdakı böyük nailiyyətlərini və mənə olan siyasi dəstəyini nəzərə alaraq, Abelardoya tam və qeyd-şərtsiz dəstəyimi ifadə etməkdən şərəf duyuram", - deyə ABŞ lideri qeyd edib.
Məlumata görə, Kolumbiya prezidenti postu uğrunda əsas mübarizə vəkil Abelardo de la Esprielya ilə senator, ölkənin hazırkı prezidentinin tərəfdarı İvan Sepeda arasında gedir.
İlkin səsvermənin nəticələrinə əsasən, birinci turda Abelardo de la Esprielya təxminən 44%, İvan Sepeda isə 41% səs toplayıb.
Qeyd edək ki, prezident seçkisinin həlledici ikinci turu iyun ayının 21-də baş tutacaq.
