ABŞ Prezidenti Donald Tramp yazıçı və jurnalist Elizabet Cin Kerrolla böhtan işi üzrə ödəməli olduğu 83.4 milyon dollar məbləğində təzminatın ləğvi üçün ABŞ Ali Məhkəməsinə müraciət edib.
Oxu.Az xəbər verir ki, bu barədə ABŞ mətbuatı, o cümlədən CNBC və "Axios" məlumat yayıb.
Məlumata görə, Trampla eyni vaxtda ABŞ Ədliyyə Nazirliyi də Ali Məhkəməyə analoji müraciət edib. Prezident və nazirlik bildirirlər ki, sözügedən ifadələr Trampın prezident səlahiyyətlərini icra etdiyi dövrdə səsləndirilib. Buna görə də, onların fikrincə, bu işdə prezident toxunulmazlığı tətbiq olunmalıdır.
Donald Trampla Elizabet Cin Kerroll arasında məhkəmə çəkişməsi onun ilk prezidentlik dövründə başlayıb və illərdir davam edir. Kerroll 2019-cu ildə dərc etdirdiyi memuarında Trampı 1996-cı ildə ona təcavüz etməkdə ittiham edib. Tramp isə Kerrollu tanımadığını bildirib, onu dəfələrlə yalan danışmaqda və bu yolla pul qazanmağa çalışmaqda ittiham edib.
Bundan sonra Kerroll Trampa qarşı təcavüz və böhtan iddiası qaldırıb. Tramp da öz növbəsində Kerrollu böhtanda ittiham edərək qarşılıqlı iddia verib. 2024-cü ildə məhkəmələr Kerrollun iddialarını təmin edib və Trampın cinsi qısnama və böhtana görə 5 milyon dollar, ayrıca böhtan işi üzrə isə daha 83.4 milyon dollar ödəməsinə qərar verib.
Tramp bu qərarlardan apellyasiya şikayəti versə də, məhkəmələr yenidən Elizabet Cin Kerrollun xeyrinə qərar çıxarıblar. "Reuters"in məlumatına görə, Kerroll artıq 5 milyon dolları (hesablanmış faizlərlə birlikdə 5.6 milyon dollar) əldə edib.
