ABŞ Prezidenti Donald Trampın vəzifədə olduğu ilk il ərzində qazanılan uğurlar siyahısına ölkənin keçmiş prezidenti Co Baydenin oğlu Hanter Baydenin hökumət himayəsindən məhrum olunması ilə bağlı məlumatlar daxil edilib.
Oxu.Az TASS-a istinadən xəbər verir ki, Ağ Evin saytında dərc olunan siyahıda Baydenin oğlu narkoman və fırıldaqçı kimi təsvir edilib.
"Narkoman və fırıldaqçı Hanter Bayden vergi ödəyiciləri tərəfindən maliyyələşdirilən Məxfi Xidmətin himayəsindən məhrum edilib", - deyə nailiyyətlər siyahısında məlumat verilib.
Xəbərdə bildirilib ki, 2020-ci il prezident seçkisindən əvvəl "New York Post" qəzeti Hanter Baydenə məxsus məxfi elektron poçt yazışmalarına əsaslanan bir hesabat dərc edib.
Yazışmalarda keçmiş ölkə liderinin oğlunun atasının rəsmi mövqeyindən öz biznes maraqları üçün istifadə etməyə çalışdığı bildirilib. Sabiq prezidentin oğlunun kompüterində onun narkotik və spirtli içki qəbul etdiyi əks olunmuş bir sıra foto və videoların da tapıldığı vurğulanıb.
