ABŞ Konqresindəki Demokratik Partiyadan olan senatorlar ölkənin hazırkı Prezidenti Donald Trampın təsviri olan 250 dollarlıq əsginasın hazırlanmasına ayrılan vəsaitlərlə bağlı yoxlama aparılmasına çalışırlar.
Oxu.Az xəbər verir ki, bu barədə mənbələrə istinadən "Axios" portalı məlumat yayıb.
Bildirilib ki, demokrat senatorlar Maliyyə Nazirliyinin Baş İnspektor İdarəsinə müraciət edərək, onların "qanunsuz 250 dollarlıq əsginas" adlandırdıqları məsələyə çəkilən xərclərin araşdırılmasını xahiş ediblər. Portal vurğulayır ki, ABŞ qanunvericiliyinə əsasən, pul əsginasları və qiymətli kağızların üzərində yalnız həyatda olmayan şəxsin portreti yerləşdirilə bilər.
"Əhalinin qiymət artımı ilə üzləşməyə davam etdiyi bir vaxtda, Maliyyə Nazirliyi prezidentin şöhrətpərəstliyi naminə qanunsuz bir layihə kimi görünən işə resurs ayırmaq əvəzinə, aktual iqtisadi problemlərin həllinə diqqət yetirməlidir", - deyə nəşr çərşənbə axşamı dərc olunmuş Demokratik Partiya nümayəndələrinin məktubundan sitat gətirir.
Bundan əvvəl ABŞ-nin maliyyə naziri Skott Bessent bildirib ki, Vaşinqton Administrasiyası Konqres dəstəkləməyəcəyi təqdirdə üzərində Trampın portreti olan 250 dollarlıq əsginasın dövriyyəyə buraxılmasına cəhd etməyəcək. "The Washington Post" qəzetinin daha öncə verdiyi məlumata görə, ABŞ Maliyyə Nazirliyi hazırkı prezidentin təsviri olan 250 dollarlıq əsginasın yaradılması ideyasını irəli sürüb. Əgər bu baş verərsə, Tramp son 150 il ərzində sağlığında ABŞ banknotuna düşən ilk şəxs olacaq.
