Türkiyə Prezidenti Rəcəb Tayyib Ərdoğan Böyük Britaniyanın Baş naziri Kir Starmerlə telefon danışığı aparıb.
Oxu.Az xəbər verir ki, bu barədə Türkiyə Prezident Administrasiyasının Kommunikasiya İdarəsi məlumat yayıb.
Məlumata görə, telefon danışığı zamanı Türkiyə ilə Britaniya arasında ikitərəfli münasibətlər, həmçinin regiondakı münaqişə mühiti ilə bağlı regional və qlobal məsələlər müzakirə olunub.
Ərdoğan bildirib ki, Türkiyə və Böyük Britaniya arasında əməkdaşlığın, xüsusilə müdafiə sənayesi sahəsində olmaqla, bir çox istiqamətlər üzrə daha da inkişaf etdirilməsi üçün güclü siyasi iradə mövcuddur. O qeyd edib ki, iki ölkə arasındakı tərəfdaşlığın genişləndirilməsi üçün yeni addımlar atılmağa davam ediləcək.
Söhbət zamanı Türkiyə lideri İranla bağlı baş verən hadisələri yaxından izlədiklərini vurğulayıb. Onun sözlərinə görə, hücumların uzun müddət davam etməsi həm regional, həm də qlobal sabitliyə ciddi zərər vura bilər.
Ərdoğan əlavə edib ki, hələ də dialoq üçün imkanlar mövcuddur və sülhə yönəlmiş təşəbbüslər davam etdirilir.
