Türkiyə 2027-ci ildə silah və hərbi texnikanın satın alınmasına ayrılan xərcləri 229% artırmağı planlaşdırır.
Oxu.Az "SavunmaSanayiST"yə istinadən xəbər verir ki, bunu Türkiyənin vitse-prezidenti Cevdet Yılmaz gələn ilin büdcə layihəsini təqdim edərkən bildirib.
Qeyd olunur ki, 229%-lik artım silahların, döyüş sursatlarının, silah sistemlərinin və digər hərbi texnikanın satın alınmasına ayrılan vəsaitlərə də şamil olunacaq. C.Yılmaz xərclərin ayrı-ayrı istiqamətlər üzrə bölgüsü barədə ətraflı məlumat verməyib.
Onun sözlərinə görə, 2027-ci ildə müdafiə xərcləri üçün 2.2 trilyon lirə (təxminən 44.6 milyard dollar) ayrılması nəzərdə tutulub. Bundan əlavə, 1.2 trilyon lirənin (təxminən 24.3 milyard dollar) daxili təhlükəsizliyə yönəldilməsi planlaşdırılır.
Yılmaz Türkiyənin müdafiə sənayesi məhsullarının ixracında da əhəmiyyətli artım olduğunu qeyd edib.
"2002-ci ildə müdafiə və aviasiya sənayesi məhsullarının ixracının həcmi cəmi 248 milyon dollar təşkil edirdi. 2025-ci ilin yekunlarına görə isə bu göstərici 40 dəfə artaraq 10,05 milyard dollara çatıb", - deyə vitse-prezident bildirib.
