Qadının ailədə yaxşı yemək bişirib-bişirməməsi ilə bağlı müzakirələr Türkiyədə Ali Məhkəmənin mühüm qərarı ilə yeni ölçü qazanıb.
Bu barədə Oxu.Az "Haber Global"a istinadən xəbər verir.
Məlumata görə, bir müddətdir şiddətli ailə münaqişələri yaşayan cütlük Ailə Məhkəməsinə müraciət edərək, boşanma iddiası qaldırıb. İddiaçı olan ər bildirib ki, ortaq uşaqlarının dünyaya gəlməsindən sonra arvadı ona pis davranmağa başlayıb, onu daim təhqir edib, alçaldıb, yemək verməyib. O, həmçinin bildirib ki, arvadı soyuducunu kilidlədiyi üçün ikinci soyuducu almağa məcbur qalıb.
İddiaçı olan qadın isə deyilənləri qəbul etməyib, ərinin onun əvvəlki evliliyindən olan qızlarına xor baxdığını, təhqir etdiyini, ailə quran iki qızının toylarında belə iştirak etmədiyini bildirib. Qadının sözlərinə görə, əri onun bişirdiyi yeməkləri bəyənməyib, "sən cahilsən, sənin yeməklərin zəhərlidir" kimi ifadələrlə onu alçaldıb.
Tərəfləri dinlədikdən sonra Ailə Məhkəməsi yeməkləri bəyənməməklə yanaşı, evin ərzaq alış-verişini də etməyən əri arvaddan daha çox təqsirli hesab edib. Məhkəmə cütlüyün boşanmasına, ortaq uşağın qəyyumluğunun atasına verilməsinə, ortaq uşaqla anası arasında şəxsi əlaqənin yaradılmasına, qadının xeyrinə aylıq 750 lirə alimentin təyin edilməsinə və qadının lehinə 20 000 lirə maddi təzminat və 15 000 lirə mənəvi təzminatın ödənilməsinə qərar verib.
Ər qərardan apellyasiya şikayəti verib, lakın qərar qüvvədə saxlanılıb.
