Ukrayna 1212 hərbçisinin cəsədinin geri qaytarıldığını açıqladı

Ukrayna Koordinasiya Qərargahı 1212 nəfər həlak olmuş hərbçinin cəsədinin geri qaytarıldığını bildirib. Bu, Rusiya tərəfinin ilk mərhələdə təhvil verməyə hazır olduğunu bəyan etdiyi sayla üst-üstə düşür.

Oxu.Az bu barədə RBK-ya istinadla xəbər verir.

Məlumata görə, cəsədlər Kursk, Xarkov, Zaporojye, Xerson vilayətləri, həmçinin Donetsk və Luqansk ərazisindəki döyüşlərdə həlak olanlara məxsusdur.

Qərargah Beynəlxalq Qızıl Xaç Komitəsinə göstərdiyi dəstəyə görə təşəkkürünü bildirib. Cəsədlər yaxın günlərdə Ukrayna Daxili İşlər və Səhiyyə nazirliklərinə ekspertiza üçün təhvil veriləcək. Mərhumların şəxsiyyətlərinin qısa müddətdə müəyyən olunacağı qeyd olunub.

Rusiya Dövlət Dumasının deputatı Şamsail Saraliev də cəsədlərin təhvil verilməsini təsdiqləyib.

Qeyd edək ki, Ukrayna və Rusiya 2 iyun tarixində İstanbulda keçirilən danışıqlarda "6000-ə qarşı 6000" formatında cəsəd mübadiləsi barədə razılığa gəlib. 7 iyunda Rusiya nümayəndə heyətinin rəhbəri Vladimir Medinski 1212 ukraynalı hərbçinin cəsədinin mübadilə zonasına çatdırıldığını, lakin Ukrayna tərəfinin repatriasiyanı qeyri-müəyyən müddətə təxirə saldığını açıqlamışdı.

Ukrayna qərargahı isə həmin vaxt bildirmişdi ki, mübadilə tarixi razılaşdırılmayıb və Rusiya birtərəfli addım atıb.

Sonuncu dəfə Ukrayna və Rusiya 16 may tarixində cəsədlərlə mübadilə aparmışdı. Həmin vaxt Kiyev 909, Moskva isə 34 hərbçinin cəsədini geri almışdı. Bu həftə, həmçinin 9 və 10 iyunda əsir mübadiləsi də baş tutub, lakin say açıqlanmayıb.