Ali Radada Ukraynanın Müstəqil Dövlətlər Birliyinin (MDB) təşkilatlarında üzvlüyünü və iştirakını dayandıran qanun layihəsi qeydiyyatdan keçib.
Oxu.Az xəbər verir ki, bu barədə noyabrın 27-də parlamentin saytında bildirilib.
Sənədlərin müəllifi on deputatdır: “Batkivşina” partiyasının lideri Yuliya Timoşenko, eyni partiyanın üzvləri Boris Tarasyuk, İvan Krulko, İqor Jdanov, Alena Şkrum, Andrey Komejyakin, Sergey Yevtuşok, “Petr Poroşenko bloku” nümayəndələri – Ukrayna prezidentinin krım-tatar xalqları ilə iş üzrə müşavirləri Mustafa Cəmilev və deputat Valeri Paskan, eləcə də “Xalq cəbhəsi” partiyasından deputat Vyaçeslav Kirilenkodur. Qanun layihəsinin mətni hələ açıqlanmayıb.
Noyabrın 14-də Ukrayna Nazirlər Kabineti Rusiya, MDB və Avrasiya İqtisadi İttifaqı ilə əməkdaşlıq üzrə müşavir vəzifəsini ləğv edib. Bu zamana qədər Ukrayna prezidenti Petr Poroşenko MDB-nin İcraçı Komitəsindən ölkənin nümayəndəsi Anatoli Dronyanı geri çağırıb.
Cari ilin oktyabr ayında Ali Radanın müzakirəsinə MDB-nin yaradılmasına dair razılaşmanın dayandırılması üçün qanun layihəsi çıxarılıb. O zaman layihə təşəbbüsü “Svoboda” partiyasından gəlmişdi.
Ukrayna 1991-ci ilin dekabr ayının 10-dan MDB-nin təsisçi ölkələrindəndir. Eyni zamanda Ukrayna hakimiyyəti MDB-nin nizamnaməsini qəbul etməyib, ona görə də MDB-nin iştirakçısı hesab edilə bilməz. Narıncı inqilaba qədər Ukraynanın MDB-də statusu məsələsi nəzərdən keçirilməyib. Viktor Yuşenko prezident seçildikdən sonra Ukraynanın MDB-nin tərkibindən çıxması və sonradan NATO və Aİ-yə daxil olmaq barədə bəyanatlar eşidilməyə başladı.
