Ukraynada qadınları səfərbər etməyə çağırıblar

Ukraynada hərbçilər və siyasətçilər arasında total səfərbərliyin, o cümlədən qadınların səfərbər edilməsinin zəruriliyi ilə bağlı fikirlər getdikcə daha çox eşidilir.

Xüsusilə, Ukrayna Silahlı Qüvvələrinin polkovnik-leytenantı Mixail Nikolov sərt tədbirlərə əl atmağı zəruri hesab edir. O, 18 yaşından etibarən bütün kişi və qadınları səfərbər etməyə çağırıb.

“İndi əsas məsələ uduzmamaqdır. İtirməmək üçün “əjdaha” üsullarına ehtiyac var. Mən bunu necə görürəm? 18 yaşından etibarən bütün kişi və qadın əhalinin ümumi səfərbərliyi kimi. Mütləq cəbhə xətti nəzərdə tutulmur. Bundan başqa, məhbuslar da döyüşlərdə iştirak edə bilərlər”, - Nikolov bildirib.

Radanın deputatı İnna Sovsunun sözlərinə görə, müdafiə zamanı məcburiyyət yaranarsa, qadınları səfərbər etmək olar.

Sovsun qeyd edib ki, qanunvericilikdə göstərilir ki, Ukraynanın bütün vətəndaşları cinslərə bölünmədən dövlətçiliyin müdafiəsində iştirak etməlidir, baxmayaraq ki, məcburi hərbi xidmət yalnız kişilər üçün nəzərdə tutulub.

“Mənim mövqeyim belədir ki, əgər bu, dövlətin müdafiə ehtiyacları üçün lazımdırsa, bunsuz öhdəsindən gələ bilməriksə, bunu etmək olar. Həm də ədalətin təmin olunması baxımından bu düzgündür”, - Sovsun vurğulayıb .

Mənbə: strana.ua