Əksər hallarda sürətli ürək döyüntüsü təhlükəli olmasa da, bəzən həqiqətən də tibbi yardım tələb edir.
Oxu.Az-ın xəbərinə görə, bu barədə həkim-terapevt Aleksandr van Tulleken "Daily Mirror" nəşrinə müsahibəsində danışıb.
O, hansı əlamətlərin təhlükəli hesab edilə biləcəyini izah edib.
Aleksandr van Tullekenin sözlərinə görə, ürək qəfildən çox sürətli və ya nizamsız döyünməyə başlayırsa və bu hal təkrarlanırsa, ehtiyatlı olmaq lazımdır. Həkim, xüsusilə, narahatedici hallar kimi ürək döyüntüsünün artması fonunda sinədə ağrı və ya təzyiq hissinin, nəfəs darlığının, başgicəllənmənin və ya huşunu itirəcəkmiş kimi hiss etmənin ortaya çıxmasını qeyd edib.
Həkim izah edib ki, bu cür simptomlar qulaqcıqların fibrilyasiyası (ən geniş yayılmış ürək aritmiyasıdır - red.) ilə bağlı ola bilər. Bu patologiya tromb (qan laxtası) əmələ gəlməsi, insult və ürək çatışmazlığı riskini əhəmiyyətli dərəcədə artırır. Sinədə şiddətli ağrı, ağır nəfəs darlığı və ya huşunuzu itirəcəyinizi hiss edirsinizsə, həkim dərhal tibbi yardıma müraciət etməyi məsləhət görüb.
