Kardioloq Valentina Baydina infarktın profilaktikasının əsasını gündəlik vərdişlərin təşkil etdiyini bildirib.
Oxu.Az Lenta.ru-ya istinadən xəbər verir ki, həkimin sözlərinə görə, infarktın profilaktikasının əsasını sadə gündəlik vərdişlər və orqanizmin göstəricilərinə nəzarət təşkil edir. O, ürək-damar fəsadlarının qarşısının alınması üçün əsas tövsiyələri açıqlayıb.
Həkim ürəyin qorunması üçün ən əsas və əlçatan vasitə kimi arterial təzyiqin müntəzəm monitorinqini göstərib.
"Hipertoniya illərlə tamamilə simptomsuz keçə, damarları hiss olunmadan zədələyə və ürək əzələsini həddindən artıq yükləyə bilər. Özünüzü əla hiss etsəniz belə, təzyiqi ölçməyi vərdiş halına gətirin", - deyə Baydina tövsiyə edib.
Kardioloqun sözlərinə görə, ikinci vacib addım illik müayinədən keçməkdir. O bildirib ki, hər bir yetkin insan ildə ən azı bir dəfə elektrokardioqramma (EKQ) etdirməlidir. Əgər insanda vaxtaşırı sinədə ağrı, ağırlıq və ya yanma hissi yaranırsa, planlaşdırılan həkim qəbulunu gözləmədən dərhal müayinədən keçmək lazımdır.
Kardioloq həmçinin qanda qlükoza və xolesterinin səviyyəsini nəzarətdə saxlamağı tövsiyə edib.
Bundan əlavə, həkim xroniki yuxusuzluqdan, hərəkətsizlikdən, eləcə də kofein və energetik içkilərin həddindən artıq istifadəsi də daxil olmaqla, stimulyatorların nəzarətsiz qəbulundan çəkinməyə çağırıb. O, həmçinin virus infeksiyalarını ayaqüstə keçirməməyi və sinə ağrısını ağrıkəsici preparatlarla yatırmamağı tövsiyə edib. Baydinanın izahına görə, bu cür vərdişlər ürəyi həddindən artıq yüklə işləməyə məcbur edir.
