Asiyada səhmlər, ilk növbədə yapon şirkətlərinin səhmləri hakim Liberal Demokrat Partiyasının yeni rəhbəri Sanae Takaiçinin Yaponiyanın baş naziri təyin edilməsi ərəfəsində tarixi maksimuma çatıb.
Oxu.Az-ın xəbərinə görə, bu barədə "Bloomberg" nəşri yazıb.
Asiyanın "MSCI" fond indeksi ardıcıl altıncı gündür ki, artmağa davam edir, "Nikkei 225" isə 4.8% yüksəlib. Agentlik investorların aktivliyini mümkün artan xərclərlə bağlı narahatlıqlarla əlaqələndirir, çünki Takaiçi vergilərin azaldılması və iqtisadi stimullaşdırması mövqeyindən çıxış edir. Bütün bunlar da investorları qızıl və "Bitcoin" kimi alternativ aktivlər almağa sövq edib.
Bu arada, Yaponiyanın 30 illik dövlət istiqrazlarının (JGB) qiyməti kəskin şəkildə azalaraq, gəlirliliyi tarixi maksimuma yaxınlaşdırıb. Yapon yeni isə dollara nisbətdə 1.6% ucuzlaşaraq 149.81-ə çatıb, avroya nisbətdə 175.63-ə qədər azalıb ki, bu da tarixi minimumdur.
Həmçinin əczaçılıq, avtomobil, mühəndislik və yarımkeçirici şirkətlərin səhmlərinin dəyərinin kəskin şəkildə artdığı bildirilir. Əsas müdafiə podratçısı olan "Mitsubishi Heavy"nin istiqrazları Takaiçi hökumətində hərbi xərclərin artması gözləntiləri fonunda 13% yüksəlib.
Qeyd edək ki, 64 yaşlı Sanae Takaiçi oktyabrın 15-də parlament tərəfindən təsdiqləndikdən sonra Yaponiyanın baş naziri olacaq. O, ölkə tarixində bu vəzifəni tutan ilk qadın olacaq.
Takaiçi kifayət qədər konservativ (mühafizəkar) və "qırğı" baxışları ilə tanınır. O, pasifist Konstitusiyanın yenidən nəzərdən keçirilməsinin və ordunun gücləndirilməsinin tərəfdarıdır. Sosial siyasətdə o, mühafizəkar mövqe tutur, iqtisadiyyatda isə vergilərin azaldılmasına, vətəndaşlara birbaşa dəstək verilməsinə, kənd regionlarına subsidiyalar ayrılmasına, eləcə də energetika və yarımkeçiricilər istehsalına irimiqyaslı investisiyalar qoyulmasına stavka edir.
