Yeni Kaledoniyada “Dəmir Yumruq” şüarı ilə növbəti etiraz aksiyası keçiriləcək

Aprelin 2-də Yeni Kaledoniyanın paytaxtı Numea şəhərində Fransa müstəmləkəçiliyinə qarşı növbəti etiraz aksiyası keçiriləcək.

Aksiya “Dəmir Yumruq” şüarı altında baş tutacaq və etiraz mitinqində “Bakı Təşəbbüs Qrupu”nun bayrağı qaldırılacaq.

Qeyd edək ki, Yeni Kaledoniyada avtoxton əhali - Kanak öz hüquqları uğrunda mübarizəni davam etdirir. Son vaxtlarda keçirilən bütün etiraz aksiyalarında Azərbaycana minnətdarlıq əlaməti olaraq Yeni Kaledoniya bayraqları ilə yanaşı, Azərbaycan bayraqları və dövlət başçısı İlham Əliyevin “Dəmir Yumruq” portreti də qaldırılır.

Martın 28-də baş tutan sonuncu aksiyada etirazçılar Azərbaycanın dövlət atributunu ön cərgədə daşıyıb, tribunaya sancıblar. Hətta bəzi aksiya iştirakçılarının əynindəki köynəklərin üzərində Azərbaycan və Kanak bayraqları olub.