Astara rayonunda kişi qardaşının 10 yaşlı oğluna xəsarət yetirib.
Oxu.Az-ın məlumatına görə, hadisə Astara şəhəri ərazisində baş verib.
Şəhər sakini, 1990-cı il təvəllüdlü Elnur Ağayev (soyad şərtidir) spirtli içki qəbul edərək evə gəlib. O, evdə qardaşının 2015-ci il təvəllüdlü oğlunu çağırıb ona siqaret almaq üçün mağazaya getməsini tapşırıb. Qardaşı oğlu isə mağazaya getməkdən imtina edib. Bildirib ki, o, azyaşlı olduğu üçün ona marketlər siqaret vermirlər. Uşağın cavabından əsəbiləşən Elnur stolun üstündəki fincanı götürərək ona atıb. Fincan divara dəyərək qırılıb, qırıqları uşağın çiyin və sifət nahiyəsinə xəsarət yetirib.
Hadisə yerinə polis əməkdaşları gəliblər, Elnur saxlanılıb. Faktla bağlı cinayət işi başlanılıb, iş məhkəməyə göndərilib.
Məhkəmə istintaqı dövründə tərəflər arasında barışıq elan olduğundan cinayət işinə xitam verilib.
Samir Əli
