Bakının Qaradağ rayonu Lökbatan qəsəbəsi ərazisində baş verən yol-nəqliyyat hadisəsi zamanı xəsarət alan şəxslərin vəziyyəti açıqlanıb.
Oxu.Az-ın sorğusuna cavab olaraq Respublika Təcili və Təxirəsalınmaz Tibbi Yardım Mərkəzinin və Kliniki Tibbi Mərkəzin birgə məlumatında bildirilir ki, martın 4-də saat 3:00-da Respublika Təcili və Təxirəsalınmaz Tibbi Yardım Mərkəzinə Qaradağ rayonu, Qaradağ postu ərazisindən çağırış qeydə alınıb.
"Çağırış ünvanına beş təcili tibbi yardım briqadası cəlb olunub. Təcili tibbi yardım briqadaları tərəfindən altı nəfər (kişi) Kliniki Tibbi Mərkəzə hospitalizasiya olunub.
Müxtəlif növ bədən xəsarətləri alan pasiyentlərə zəruri tibbi xidmətlər göstərilib. Vəziyyəti qənaətbəxş qiymətləndirilən şəxslər ambulator müalicə üçün evə buraxılıblar", - deyə məlumatda vurğulanıb.
Əzizə İsmayılova
Bakının Qaradağ rayonunun Lökbatan qəsəbəsi ərazisində baş verən yol-nəqliyyat hadisəsinin təfərrüatı məlum olub.
Oxu.Az-ın sorğusuna cavab olaraq Baş Dövlət Yol Polisi İdarəsindən bildirilib ki, hadisə martın 4-də saat 03:00-da Bakı-Qazax-Gürcüstan sərhədi avtomobil yolunun 47-ci kilometrliyində qeydə alınıb.
"1985-ci il təvəllüdlü Vüsal İmamverdi oğlu İbrahimovun idarə etdiyi "Mercedes Atego" markalı 77-LV-043 dövlət nömrə nişanlı yük avtomobili 1974-cü il təvəllüdlü Samir Siyavuş oğlu Süleymanovun idarə etdiyi "KamAZ" markalı 50-CZ-886 dövlət nömrə nişanlı avtomobillə toqquşub.
Hadisə nəticəsində "Mercedes"in sürücüsü V.İbrahimov və sərnişini 1981-ci il təvəllüdlü İlhamiz Kamil oğlu Rəhimov xəsarət alıblar. Faktla bağlı araşdırma aparılır", - deyə məlumatda bildirilir.
Əzizə İsmayılova
Bakı-Ələt-Qazax magistral avtomobil yolunun Qaradağ rayonu, Lökbatan qəsəbəsi ərazisindən keçən hissəsində yol-nəqliyyat hadisəsi baş verib və vətəndaşların avtomobildə sıxılı vəziyyətdə qalıb.
Oxu.Az xəbər verir ki, bu barədə Fövqəladə Hallar Nazirliyi (FHN) məlumat yayıb.
Bildirilib ki, məlumatla əlaqədar hadisə yerinə dərhal FHN-in Xüsusi Riskli Xilasetmə Xidmətinin xilasediciləri cəlb ediliblər.
Hadisə yerində əməliyyat şəraiti qiymətləndirilərkən müəyyən olunub ki, "Mercedes Atego" markalı yük avtomobilinin "KamAZ" markalı yük avtomobili ilə toqquşması nəticəsində qəza baş verib və "Mercedes Atego" markalı yük avtomobilində vətəndaşlar müxtəlif dərəcəli bədən xəsarətləri alaraq deformasiyaya uğramış nəqliyyat vasitəsində sıxılı vəziyyətdə qalıb.
Xilasedicilər xüsusi xilasetmə vasitələrinin köməyi ilə 1972-ci il təvəllüdlü Namiq Xalid oğlu Məmmədov və 2000-ci il təvəllüdlü Emil Ramiz oğlu Babaşovu xilas edərək təcili tibbi yardım briqadasına təhvil veriblər.
Hadisə ilə əlaqədar müvafiq qurumlar tərəfindən araşdırma aparılır.
