Zabrat şosesində sərnişin avtobuslarının toqquşması ilə nəticələnən yol-nəqliyyat hadisəsi baş verib.
Məsələ ilə bağlı Oxu.Az-ın sorğusuna cavab olaraq "Grand Bus" MMC-dən bildirilib ki, 198 saylı marşrut xətti üzrə hərəkət edən nəqliyyat vasitəsində hər hansı texniki nasazlıq olmayıb:
"Belə ki, qəzaya səhər saatlarında yağan qısamüddətli yağışdan sonra yolun sürüşkən olması və ara məsafəsinin düzgün seçilməməsi səbəb olub. Hadisə ilə bağlı aidiyyəti qurumlara məlumat verilib və zəruri addımlar atılıb. Qəza nəticəsində xəsarət alan olmayıb".
Məhərrəm Əliyev
Zabrat şosesində sərnişin avtobuslarının toqquşması ilə nəticələnən yol-nəqliyyat hadisəsi zamanı xəsarət alan şəxsin vəziyyəti açıqlanıb.
Bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.
"Noyabrın 3-ü saat 07:00-da Respublika Təcili və Təxirəsalınmaz Tibbi Yardım Mərkəzinə Sabunçu rayonu, Zabrat qəsəbəsi ərazisindən yol-nəqliyyat hadisəsinin baş verməsi səbəbilə çağırış daxil olub.
Çağırış ünvanına təcili tibbi yardım briqadası cəlb olunub.
Təcili tibbi yardım briqadası tərəfindən bir nəfərə (qadın) ilkin tibbi xidmət göstərilib, müştərək travma diaqnozu ilə Sabunçu Tibb Mərkəzinə hospitalizasiya olunub", - deyə məlumatda qeyd olunub.
Zabrat şosesində qeydə alınan yol-nəqliyyat hadisəsinin başvermə səbəbi açıqlanıb.
Bu barədə Oxu.Az-a "BakuBus" MMC-nin mətbuat katibi Əsmər Əliyeva məlumat verib.
O bildirib ki, hadisəyə digər nəqliyyat vasitəsinin əyləc sistemində yaranan nasazlıq səbəb olub:
"Bu gün saat 07:00 radələrində "BakuBus" MMC-nin istismarında olan 139 nömrəli müntəzəm marşrut xətti üzrə hərəkətdə olan avtobusun iştirakı ilə Babək prospekti 111 ünvanında yol-nəqliyyat hadisəsi baş verib.
İlkin məlumata əsasən, hadisəyə digər nəqliyyat vasitəsinin əyləc sistemində yaranan nasazlıq səbəb olub və həmin nəqliyyat vasitəsinin sürücüsü idarəetməni itirərək "BakuBus" MMC-nin istismarında olan avtobusa çırpılıb.
Hadisə nəticəsində "BakuBus" MMC-nin avtobusunda sərnişinlər arasında xəsarət alan olmayıb.
Faktla bağlı aidiyyəti qurumlara məlumat verilib və araşdırma aparılır".
Bakıda iki avtobusun toqquşması ilə nəticələnən yol-nəqliyyat hadisəsi baş verib.
Oxu.Az-ın əldə etdiyi məlumata görə, hadisə Zabrat şosesində qeydə alınıb.
"Zabrat şosesində 139 nömrəli marşrut avtobusu ilə, 198 nömrəli sərnişin avtobusu toqquşub. Bir nəfər qadın xəsarət alıb", - deyə məlumatda qeyd edib.
Məsələ ilə bağlı aidiyyəti qurumlara informasiya sorğusu ünvanlanıb.
Aygün Mirakif
