Bakıda keçmiş həyat yoldaşını qətlə yetirən Zaur Qəhrəmanov hadisə yerinə "BMW" markalı avtomobillə gəlib.
Oxu.Az-ın məlumatına görə, günorta saat 15 radələrində o, yaşadığı Abşeron rayonu, Masazır qəsəbəsindəki evindən çıxıb və Bakının Nəsimi rayonu, Mircəlal küçəsi, 2 a ünvanına gəlib.
Zaur avtomobili park etdikdən sonra keçmiş həyat yoldaşını əraziyə çağırıb. O, ov tüfəngini avtomobilin yük yerində gizlədib.
Amalya ilə mübahisədən sonra o, avtomobilin yük yerindən ov silahını götürərək qadına atəş açıb.
Bakıda qadının küçədə qətlə yetirilməsinin daha bir təfərrüatı məlum olub.
Oxu.Az-ın əldə etdiyi məlumata görə, qətl hadisəsi qadının azyaşlı uşağının gözü qarşısında baş verib.
Belə ki, Zaur Qəhrəmanov bir müddət əvvəl həyat yoldaşı Amalya Qəhrəmanovadan boşanıb və onların azyaşlı övladı qadında qalıb. Zaur Qəhrəmanov dünən övladını özü ilə aparmaq istəyib. Lakin qadın buna etiraz edib. O, buna görə Amalya Qəhrəmanova ilə mübahisə edib.
Bu gün isə Zaur ov tüfəngini götürərək avtomobili ilə Amalyanın iş yerinin qarşısına gəlib və uşağı görmək istədiyini deyib. Həmin vaxt Amalya uşaqla birlikdə aptekdə olub. O, uşağı atasına göstərsə də, onu aparmasına icazə verməyib.
Zaur Amalyadan uşağı maşına gətirməyi xahiş edib. Bildirib ki, o, uşaqla avtomobildə görüşmək istəyir. Amalya da onunla razılaşıb və uşağı avtomobilə atasının yanına gətirib. Zaur uşağı avtomobilə əyləşdirəndən sonra oradan uzaqlaşmaq istəyib. Lakin Amalya uşağı ondan alıb işlədiyi aptekə qaçıb.
Zaur Qəhrəmanov isə avtomobilində olan ov tüfəngini götürərək aptekə tərəf gedib. Amalya uşağı aptekə qoyub, özü isə qaçmağa cəhd edib. Zaur onu yaxalayaraq ov tüfəngi ilə qətlə yetirib.
Bakıda baş verən silahlı insident nəticəsində yaralanan şəxsin son vəziyyəti açıqlanıb.
Bu barədə Oxu.Az-ın sorgusuna cavab olaraq Tibbi Ərazi Bölmələrinin İdarəetmə Birliyindən (TƏBİB) bildirilib:
"İyulun 9-da, saat 16:30-da Respublika Təcili və Təxirəsalınmaz Tibbi Yardım Mərkəzinə Bakı şəhəri, Yasamal rayonu, "Şamaxinka" ərazisindən çağırış qeydə alınıb. Çağırış ünvanına təcili tibbi yardım briqadası cəlb olunub.
Təcili tibbi yardım briqadası tərəfindən bir nəfər (kişi) müştərək travma diaqnozu ilə Kliniki Tibbi Mərkəzə hospitalizasiya olunub.
Gözün dağılmış yarası və kəllədaxili travma diaqnozları təyin edilən pasiyentə zəruri tibbi xidmətlər göstərilib.
Hazırda müalicəsi davam etdirilir, vəziyyəti ağır qiymətləndirilir.
Qeyd edək ki, təcili tibbi yardım briqadası tərəfindən bir nəfərin (qadın) hadisə yerində həkiməqədər ölüm faktı qeydə alınıb".
Küçədə güllələnən Amalya Qəhrəmanovanın ölümü ilə bağlı daha bir təfərrüat məlum olub.
Oxu.Az-ın məlumatına görə, o, iş yerinin qarşısında qətlə yetirilib.
Belə ki, 44 yaşlı qadın həmin küçədə fəaliyyət göstərən aptekdə əczaçı işləyirmiş.
Məlumata görə, Z.Qəhrəmanov silahla aptekin qarşısına gələrək onu öldürmək istəyib. Qadın aptekdən küçəyə qaçıb və ərazidən uzaqlaşmaq istəyib. Həmin vaxt Z.Qəhrəmanov onu küçədə yaxalayıb və atəş açaraq onu qətlə yetirib.
Qeyd olunub ki, Zaurla Amalya bir neçə ay əvvəl rəsmi boşanıblarmış.
Bakıda baş verən silahlı insidentin təfərrüatı məlum olub.
Oxu.Az-ın əldə etdiyi məlumata görə, hadisə nəticəsində güllələnən Amalya Qəhrəmanova 44 yaş yaşında olub. Hadisədə şübhəli bilinən Zaur Qəhrəmanovun isə 43 yaşı olub.
Qeyd edək ki, kişinin tüfənglə keçmiş arvadını güllələyərək qətlə yetirdiyi ehtimal edilir. Daha sonra o özünə atəş açıb, yaralı vəziyyətdə xəstəxanaya yerləşdirilib.
Şükufə Süleymanlı
Bakıda keçmiş həyat yoldaşını küçədə güllələdiyi ehtimal olunan şəxs saxlanılıb.
Oxu.Az-ın əldə etdiyi məlumata görə, polis əməkdaşlarının keçirdikləri tədbirlərlə hadisəni törətməkdə şübhəli bilinən keçmiş ər tutulub.
Samir Əli
Bakıda silahlı insident baş verib.
Oxu.Az "Unikal"a istinadən xəbər verir ki, hadisə paytaxtın Nəsimi rayonu, Mir Cəlal küçəsində qeydə alınıb.
Belə ki, kişinin tüfənglə keçmiş arvadını güllələyərək qətlə yetirdiyi ehtimal edilir. Daha sonra o özünə atəş açıb, yaralı vəziyyətdə xəstəxanaya yerləşdirilib.
Hadisə yerinə polis əməkdaşları cəlb olunublar.
Faktla bağlı araşdırma aparılır.
