"Son günlər qeydə alınan yol-nəqliyyat hadisələri bir daha göstərir ki, motosiklet və mopedlə hərəkət zamanı ən kiçik səhv belə ağır nəticələrə gətirib çıxara bilir. Təkcə ötən gün baş verən beş qəzadan üçü bu nəqliyyat vasitələrinin iştirakı ilə qeydə alınıb".
Bu barədə Oxu.Az-a Baş Dövlət Yol Polisi İdarəsinin (BDYPİ) Hərəkətin Təhlükəsizliyinin Təbliği Şöbəsinin rəisi, polis polkovnik leytenantı Rövşən Tağıyev məlumat verib.
Şöbə rəisi bildirib ki, sürətin yol və hava şəraitinə uyğun seçilməsi, manevr zamanı ehtiyatlı davranılması və qoruyucu vasitələrdən istifadə həyati əhəmiyyət kəsb edir.
Baş Dövlət Yol Polisi İdarəsinin məlumatında da bildirilir ki, təkcə ötən gün Yasamal, Xətai və Abşeron rayonları ərazisində xəsarətlərlə nəticələnən sözügedən üç qəzanın hər biri toqquşma ilə nəticələnib:
"Cari ilin ilk üç ayı ərzində isə respublika üzrə motosiklet və moped sürücülərinin təqsiri səbəbindən baş verən beş yol-nəqliyyat hadisəsində üç nəfər həyatını itirib, ikisi xəsarət alıb".
BDYPİ motosiklet və moped sürücülərinin diqqətinə çatdırıb ki, özlərinin və digər hərəkət iştirakçılarının təhlükəsizliyi üçün yol hərəkəti qaydalarına ciddi riayət olunmalı, yol və hava şəraitinə uyğun sürət düzgün seçilməli, manevr zamanı təhlükəsizlik qaydalarına əməl edilməli, həmçinin qoruyucu vasitələrdən istifadə təmin olunmalıdır: "Tələblərin pozulması ağır yol-nəqliyyat hadisələrinə, bəzən isə insan həyatının itirilməsi ilə nəticələnən faciələrə səbəb olur. Baş Dövlət Yol Polisi İdarəsi bir daha sürücüləri məsuliyyətli davranmağa və təhlükəsizlik qaydalarına əməl etməyə çağırır".
