Beyləqan Rayon İcra Hakimiyyətinin vəzifəli şəxsindən şikayət edən qadın məhkəməyə verilib.
Oxu.Az-ın məlumatına görə, Beyləqan Rayon İcra Hakimiyyətinin Kommunal Müəssisələr Təsərrüfatının müdiri Arzu Bəndəliyev ondan şikayətçi olan rayon sakini Həmidə Kərimova barəsində xüsusi ittiham qaydasında Beyləqan Rayon Məhkəməsinə şikayət edib. A.Bəndəliyev şikayətçi qadının həbsini tələb edib.
İş Beyləqan Rayon Məhkəməsinin sədrinin icraatına veriləndən sonra isə H.Kərimova məhkəmə tərkibinə etiraz edib və bu barədə Şirvan Apellyasiya Məhkəməsinə müraciət ünvanlayıb. Məhkəmə etirazı təmin edib və iş digər hakimlərin icraatına verilməsi üçün Beyləqan Rayon Məhkəməsinə göndərilib.
Xatırladaq ki, Beyləqan rayon sakini Həmidə Kərimova media qurumlarına müraciət edərək bildirib ki, o, aztəminatlı ailə kimi ünvanlı sosial yardım aldığı halda yardım qəfil kəsilib. Xanım məsələ ilə bağlı araşdırma apararkən məlum olub ki, onun xəbəri olmadan adı Beyləqan Rayon Kommunal Müəssisələr Təsərrüfatında işçi kimi rəsmiləşdirilib.
Qadın məsələ ilə bağlı hüquq-mühafizə orqanlarına müraciət edərək, qurumun rəhbəri Arzu Bəndəliyevin qanunsuz hərəkətlərindən şikayət edib. O, daha sonra "TikTok" sosial şəbəkəsində çıxış edərək, A.Bəndəliyevi ittiham edib. Müəssisə rəhbəri də H.Kərimova tərəfindən şərəf və ləyaqətinin təhqir edildiyini iddia edib və bu barədə məhkəməyə müraciət edib.
Samir Əli
