Gədəbəydə qayınata uşaqlarını görməyə gələn kürəkənini döyüb, əl-qolunu bağladı

Gədəbəy rayonunda qayınata kürəkənini döyüb.

Oxu.Az-ın məlumatına görə, hadisə rayonun İnəkboğan kəndində baş verib.

Kənd sakini Mübariz Ağayev kürəkəni Nihadı döyərək müxtəlif bədən xəsarətləri yetirib və onun əllərini kəndirlə bağlayıb.

Belə ki, Nihadın həyat yoldaşı onunla dalaşaraq uşaqlarını da götürüb atası Mübarizin evinə gedib. Bir müddətdən sonra məlum olub ki, Nihadın həyat yoldaşı ondan boşanmaq istəyir. Nihad bu barədə qızın qardaşına məlumat versə də, nəticə olmayıb. Hadisədən əsəbiləşən Nihad qayınatasıgilə gedərək, uşaqlarını görmək istəyib. Bu vaxt onu qarşılayan qayınatası Mübariz Ağayev Nihadı həyətdən qovmaq istəyib. Bu məqsədlə o, Nihadın üzərinə gəlib. Nihat özünü müdafiə etmək üçün cibindəki bıçağı çıxarıb. Bu vaxt Mübariz əlindəki ağacla vurub bıçağı Nihadın əlindən yerə salıb, daha sonra onu təpik və yumruq zərbələri ilə döyməyə başlayıb. Kürəkəninə müxtəlif bədən xəsarətləri yetirən qayınata daha sonra Nihadın əl-qolunu kəndirlə bağlayıb, polisə məlumat verib.

Araşdırmalar zamanı Nihadın günahsız olduğu müəyyən edilib və Mübariz Ağayevə cinayət işi başlanıb.

Cinayət işi yekunlaşıb, iş məhkəməyə göndərilib. Məhkəmə istintaqı zamanı tərəflər arasında barışıq əldə edilib və qayınata vurduğu ziyana görə kürəkəninə təzminat ödəyib.

Məhkəmə cinayət işinə xitam verib və M.Ağayev məsuliyyətdən azad edilib.

Aqil Vəlili