Gəncə şəhərində bıçaqlanan 16 yaşlı gəncin vəziyyəti açıqlanıb.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.
"Noyabrın 9-u saat 19:50-də 2009-cu il təvəllüdlü şəxs (kişi) Gəncə Şəhər Birləşmiş Xəstəxanasının nəzdində olan Akademik Z.Məmmədov adına xəstəxananın Təcili tibbi yardım şöbəsinə hospitalizasiya olunub.
Sağ ayağın kəsilmiş, deşilmiş yarası diaqnozu təyin olunan pasiyentə zəruri tibbi xidmətlər göstərilib. Vəziyyəti qənaətbəxş hesab olunan şəxs ambulator müalicə üçün evə buraxılıb", - məlumatda qeyd olunub.
Gəncə şəhərində 16 yaşlı gənci bıçaqlayan şəxs saxlanılıb.
Oxu.Az xəbər verir ki, polis əməkdaşlarının keçirdikləri müvafiq tədbirlər nəticəsində Elgün Əliyevə kəsici-deşici alətlə xəsarət yetirməkdə şübhəli bilinən A.Abbaszadə saxlanılıb.
Xatırladaq ki, sözügedən bıçaqlanma hadisəsi noyabrın 9-u Gəncə şəhəri, Atatürk prospektində qeydə alınıb.
Aygün Mirakif
